📰 फसवणुकीने घेतले ₹७९,०००, पण सायबर पोलिसांची तत्पर कारवाई; तक्रारदाराला पूर्ण रक्कम परत!

मिरा-भाईंदर, वसई-विरार:क्रेडिट कार्डची पेमेंट लिमिट वाढवून देण्याचे आमिष दाखवत एका नागरिकाची ₹७९,०००/- ची सायबर फसवणूक झाली होती. मात्र, मिरा-भाईंदर, वसई-विरार पोलीस आयुक्तालयातील सायबर पोलिसांनी तातडीने आणि प्रभावी कारवाई करत ही पूर्ण रक्कम परत मिळवण्यात यश मिळवले आहे.मिरारोड पोलीस ठाण्याच्या हद्दीत राहणारे तक्रारदार श्री. काकडे यांना एका अनोळखी व्यक्तीने मोबाईलवर लिंक पाठवून सांगितले की, त्यांच्या क्रेडिट कार्डची पेमेंट लिमिट वाढवली जाईल. तक्रारदारांनी सदर लिंकवर क्लिक करताच त्यांच्या खात्यातून ₹७९,०००/- ची रक्कम कपात झाल्याचा मेसेज प्राप्त झाला. त्यानंतर त्यांनी सायबर पोलिसांकडे तक्रार दाखल केली. ही तक्रार २८ जुलै २०२५ रोजी NCCRP पोर्टलवर नोंदवण्यात आली.

सायबर पोलिसांनी तात्काळ तपास सुरू करत रक्कम कुठे वर्ग झाली आहे याचा मागोवा घेतला. फसवणूक Online Ticket Booking App च्या माध्यमातून झाल्याचे निष्पन्न झाले. पोलिसांनी त्या कंपनीसोबत त्वरित पत्रव्यवहार करून सलग तीन दिवस पाठपुरावा केला आणि अखेर ₹७९,०००/- ची पूर्ण रक्कम तक्रारदाराच्या मूळ खात्यावर परत करण्यात आली.

पोलिसांचा इशारा आणि नागरिकांना आवाहन:
सायबर पोलिसांनी नागरिकांना सतर्कतेचा इशारा देताना सांगितले आहे की:

• बँक प्रतिनिधी कोणत्याही प्रकारे SMS/Call द्वारे तुमची वैयक्तिक माहिती मागत नाहीत.
• अनोळखी लिंकवर कधीही क्लिक करू नये.
• कोणत्याही App ची आधी पडताळणी करा आणि मगच डाऊनलोड करा.
• फसवणूक झाल्यास तात्काळ बँक, पोलिस स्टेशन किंवा cybercrime.gov.in अथवा 1930/1945 हेल्पलाईन वर संपर्क साधावा.

ही कामगिरी केली:
सदरची कामगिरी श्री. संदिप डोईफोडे, पोलीस उप आयुक्त (गुन्हे), श्री. मदन बल्लाळ, सहा. पोलीस आयुक्त (गुन्हे), मि.भा.व.वि.पोलीस आयुक्तालय यांच्या  मार्गदर्शनाखाली प्रभारी अधिकारी सायबर पोलीस ठाणे पोलीस निरीक्षक सुजितकुमार गुंजकर यांचेसह सपोनि/स्वप्नील वाव्हळ, पोउपनिरी/प्रसाद शेनोळकर, पोउनि/वैभव धनवडे, मपोहवा/माधुरी धिंडे, मपोअं/सुवर्णा माळी, पोअं/राहुल बन, पोअं/सावन शेवाळे, मसुब राजेश भरकडे सर्व नेम सायबर पोलीस ठाणे यांनी पार पाडली आहे.

सायबर फसवणुक हेल्पलाईन वेबसाईट www.cybercrime.gov.in